كاس هجرك ياترف ماينجرع مره
والك بالكَلب يوميه ألك مره
اغلط يوم واذكرني ولو مره
تعال وشوف هجرك شعمل بيه
--------------
ولاطر,,,,,
خيط الفجر لاهلهل ولاطر
ولاطيفك ذكر ولفه ولاطر
يهل تنشد على كَليبي مهو طار
فرفر من عذابي الجان بيه
----------------
يوماي....
اسلم للحبيب بلطف يوماي
بسبب ابعد بعد ماجان يوماي
عسر يومن دنه يحباب يوماي
اموتن مغرم بحضن الغويه
--------------
هاوين.......
سريتوا بالضعن ياترف هاوين
جفيتوني ولعند الغير هاوين
هاميت يحلو الطول هاوين
حياتي وانظر اكَبالك عليه
-------------
لامت..........
وين اللي يرد الضعن لامت
انشظه عكَلي وعليه الناس لامت
يكَلي اصبر واكَله لامت
الصبر اثر اخزان وعمل بيه
---------------
والنه دنه.......
لنه صدر المجالس وألنه دنه
ولنه الجفنه الوسيعه والنه دنه
لنه صوله على حدنه والنه دنه
اباة ولاتجد بيه الرديه
-----------
وجناك ,,
ترف خدك يلالي براس وجناك
ربح بيت الذي رباك وجناك
والله لون عندي ثمن واجناك
حرز بالبيت تبعد كل بليه
---------------
الى مت ...
اعد بسنين العمر واحسب الى مت
وعليك الناس تنشدني ولامت
إذا جرحي الغفه بفراكَك ولامات
يموت لحين رجعتكم اليه
-------------
نثرت دموعي للاسمر والاكحل
وصبغ وجانتي على خدودي ولك حل
صدكني سهل انت ولك حل
احلك لو ترد انت علية
على ضيم الهوى ياروح علمي
وبيها ارفعت اني اليوم علمي
اسالتها المستوى وتكول علمي
بخامس باء يالتسال عليه
قلبي انت ملكته وانت حر بيه
عليل وطبي عندك وانت حر بيه
كاس السم اشربه وانتحر بيه
اذا غيرك يمس اطراف ادية
باب الدار بجفوفي لحني
وحنين النوك ما يوصل لحني
وطيت لكن اسهمك لحني
بوسط قلبي وطبيبي احتار بية
هلي وياهم چنت عايش بلاهم
ونهاري شماضوى مظلم بلاهم
هلي مدري الوكت شنهو بلاهم
ولاهم اعرفوا بالصار بيه
حبيبي لا تظن انساك ولهه
دوه الروحي غرامك صار ولهة
الشفة والعين ترد عليك ولها
تدعيلك كل صباح وكل مسية
الك ياصاح ماظل مني خاطر
واحسبه احساب دربك من اخاطر
تعال كرب حبيبي مني خاطر
تعرف اجنون حبك اسوه بيه
انا بگاروك حبك وانته هزني
صرت فرصه بحياتك وانتهزني
انه شجره محبتك وانته هزني
وخلي الورد يتناثر عليه
عيونك تصيب الگلب بسهام
يلي ابد ماشفت بهواك بسهام
انا طير المهاجر بالفضاء بسهام
اشوفك وانا تايه بالبريه
يـحلو الاطبـاع واصلني وقارب
ماعندي اهل غيرك وقـارب
سفينه بالبـحر ردتك وقـارب
تشيل الحمل من يثگل عليـــه
تغيب الروح بغيابك واردها
كتاب جفاك من عندك وردها
روحي بفركتك يذبل وردها
شمس انت وتنور الدرب ليه
تلوعنة وشفنه كل حلاوتهم ومرهم
والروح تمشي على طوعهم وأمرهم
حبيبي دوه لجروحي ومرهم
تمنيته يجي ويحن عليه
همت وانسلب عكلي وزاد مرضاي
على المر ماشفت شخصة مر ضاي
لون بات الترف بحشاي مرضاي
لكه اكرب يهل مبعد علية
بسك لا تضل تشكي بهاماك
وتلوم العين وتعضعض بهاماك
اخذ طبع النخل وارفع بهاماك
واذا بالطين عركك هاي هية
لو ردت الحبيب اتشوفه ينشــــــاف
وطيبلك جرح بضــــــــماده ينشـاف
اخبرك بل حبيب اشلون ينشـــــــاف
بس ضيف الاميل وهاي هيــــه
سماح اطلب انا المنكم وهدنــــه
كمش بيد التعورنه وهدنــــــــه
جبل راكَع خجل جيتك وهدنـــــــه
اصير اتراب ونته اسحكَ عليه
وحك رمضان وأشرافه وكتبه
عليك يهل دمع عيني وكتبه
انه شماريد أهم خطك واكتبه
شدهني جفاك من غصبن عليه
وحگ اعيونك ورسمك وداعك
وحگ جلماتك الحلوه وداعك
يصاحب فرهَد ابروحي وداعك
انتلف ثلثين والباقي باذيه
عجب خلخال ساكك مايرنش
جبح ودموع عينك مايرنش
يرن منك مصايب مايرنش
كرهتك لوحياة تصير اليه
تعال اسمع ون النايات وون عود
يخويه امشي نرد للوطن ونعود
اذا باجر متت بالغربه ون عود
وتظل ابعيد عن ارض الوطيه
روحي من الهجر عجزت ولابت
حلفت بدار ماأنزل ولا بيت
ذكرك مابقى ب***ي ولا بد
انكطعت من كطعت الوصل بية
تلوج الروح ياأحبــابي وراكم
وعجاج الضعن سد عيني وراكَم
يدمرني الحلم بيكم وراكم
ويريت الحلم واليقــضه سويه.
وسط گلبي يظل طابع وسمهه
عسل صافي حلو مرهاوسمهه
صفيت متيه باسمي وسمهه
لان هيه النجم واني الثريه
الدنيا خلافك وحشه ومره
ولا منك بعد جيه ومره
صورك مره اضمنها ومره
اشوفنها توج نيران بيه
احبة وما احب واحد بدالة
وياذنب البدة مني وبدالة
الك منصوب بكليبي بدالة
خطك على النبض يشتغل بية
الدهر وياي اللي يريـــــــــده
بنخلة الروح ظلت بس يريده
أخوي الزامطت بسمه يريده
ونخى الشمات من هدو عليه
**********
أخوي الزامطت بسمه ميانـــــــــي
أعصرت روحي لجل عينه مي آني
غدر بالخوه ويكلي ميانــــــــــــــــي
مياني شلون يالذاتك رديه...!؟
اتمنى من كل واحد يكول الابوذيه اللي عجبته
لا تنسون الردود والتقيييم
